Comunicación de gastos do fondo extraordinario

A achega da Xunta de Galicia, con recursos propios, ao financiamento das entidades locais faise efectiva a través do Fondo de Cooperación Local, como instrumento de participación específico daquelas nos tributos da comunidade autónoma. Como é sabido, para este ano 2010, a previsión é un descenso da participación dos Concellos na referida participación.

Co obxectivo de paliar os efectos negativos que provocaría nas facendas locais dita disminución, creouse o Fondo Extraordinario de Apoio aos Concellos. A cantidade que cada concello recibirá en concepto de participación neste fondo extraordinario será igual á diferenza entre a cantidade total que lle corresponde como entregas a conta pola súa participación no Fondo de Cooperación Local do ano 2009 e a que resulte da aplicación do sinalado no artigo 55º da lei 9/2009, do 23 de decembro, de orzamentos xerais da Comunidade Autónoma de Galicia.

Segundo se prevé no artigo 56 desta lei, con carácter exclusivo para o ano 2010 constitúese un fondo extraordinario por importe total de 18.309.079 euros que se destinará á realización de gastos de investimento e do que serán beneficiarios todos os concellos galegos.

A xestión deste fondo extraordinario corresponderalle á Consellería de Presidencia, Administracións Públicas e Xustiza, e realizarase pola dirección xeral competente en materia de administración local. Polo xestor do fondo transferiránselles aos concellos as cantidades que lles corresponden pola súa participación, mediante catro entregas do mesmo importe que se realizarán no segundo mes de cada trimestre natural.

Non obstante, se, á vista das súas previsións de ingresos correntes, un concello considerase necesario dedicar parte ou a totalidade da cantidade que lle correspondese con cargo a este fondo extraordinario para atender os seus gastos correntes   poderá facelo, logo da comunicación desta circunstancia ao centro directivo xestor do fondo, con anterioridade ao 31 de decembro de 2010.

Para facer efectiva dita comunicación ponse a disposición dos concellos o formulario para o seu envío á Dirección Xeral de Administración Local.

Subir